Միջազգային առևտրի կենտրոնի (ITC) և նրա գործընկերների աջակցության շնորհիվ յոթ հայկական ընկերություններ փետրվարի 12-ից 15-ը Նյուրնբերգում մասնակցեցին օրգանական արտադրանքի BioFach 2020 առաջատար միջազգային առևտրային տոնավաճառին:
Մասնակից ընկերությունները «Առևտրի համար պատրաստ» ծրագրի շահառուներ են, որը ֆինանսավորվում է եվրոպական միության կողմից որպես EU4Business նախաձեռնության մաս և որի նպատակն է Արևելյան Եվրոպայի ՓՄՁ-ներին կապել գլոբալ և հատկապես ԵՄ շուկաներին:
Որպես BioFach-ում ITC-ի աջակցությամբ կազմված պատվիրակություն, հայկական ընկերությունները ներկայացրեցին օրգանական բազմազան արտադրանք՝ ներառյալ չրեր, խոտաբույսեր և հյութեր: ԵՄ «Կանաչ գյուղատնտեսություն նախաձեռնությունը Հայաստանում» և «Օրգանական Հայաստան» գյուղատնտեսական ՀԿ-ի հետ համատեղ, ITC- ն օգնեց ՓՄՁ-ներին կազմակերպել և նախագծել տաղավարը, պատրաստել մարքեթինգային նյութեր և կազմակերպել B2B հանդիպումներ տոնավաճառում:
Ավստրիայի կառավարության և ԵՄ-ի կողմից ֆինանսավորվող «ԵՄ կանաչ գյուղատնտեսություն նախաձեռնություն Հայաստանում» ծրագրի շահառուները նույնպես մասնակցեցին BioFach-ին և ցուցադրեցին իրենց օրգանական արտադրանքը, ներառյալ օրգանական պարարտանյութերը, մեղրը և այլն:
Հայ մասնակիցները շատ ծանրաբեռնված օրեր են ունեցել առևտրի տոնավաճառում` ստանալով առաջարկներ հնարավոր գնորդներից և հույս ունեն, որ վաճառքի համար հաջող տարի կլինի: «Այս տոնավաճառը կարևորագույն նշանակություն ունի օրգանական ապրանք արտադրողների համար», -ասում է «Սիս Նատուրալ» ընկերության արտահանման բաժնի ղեկավար Ռուզաննա Նավասարդյանը, «ITC-ի աջակցությամբ և ԵՄ ֆինանսավորմամբ մենք կարողացանք ըստ արժանվույն ներկայացնել մեր արտադրանքը և ստացանք առաջարկներ ոչ միայն մեր ներկայիս գործընկերներից, այլ նաև պոտենցիալ գնորդներից: Մենք ակնկալում ենք ունենալ նոր երկարաժամկետ գործարար հարաբերություններ»:
BioFach-ը օրգանական ապրանքների համար աշխարհի ամենամեծ տոնավաճառն է: Այն հավաքում է ավելի քան 3,200 ցուցադրող ընկերություններ և մոտ 50,000 առևտրի այցելուներ 130 երկրներից: Այն արդյունաբերության ոլորտի լավագույն մատակարարների և որոշումներ կայացնողների հանդիպման կետն է, ուստի տոնավաճառին մասնակցությունը հնարավորություն կտա հայկական ընկերություններին գտնել վաճառքի նոր հնարավորություններ և գործընկերներ:
