DataLogger-ը երևանյան ընկերություն է, որը մասնագիտացված է խելացի մեքենաների և տվյալների ձեռքբերման կառավարման համակարգերի մեջ: DataLogger-ի ստեղծած WiseLogger-ը ճկուն, կազմաձևվող, օգտագործման համար պատրաստ և դյուրին կիրառելի լուծում է, որը տվյալները գրանցողները կարող են օգտագործել բազմաթիվ բնագավառներում, ինչպիսիք են՝ արդյունաբերական արտադրությունը և ավտոմատացումը, հեռակա մոնիտորինգը, ավտոմոբիլային արդյունաբերությունը, տվյալների հավաքագրումը, դեղագործական արտադրությունը և հետազոտությունը:
2017 թվականին DataLogger-ը EU-SMEDA ծրագրի կողմից ստացավ Նորարարության զարգացման համաֆինանսավորվող դրամաշնորհ (ՆԶՀԴ), որը ֆինանսավորվում է Եվրոպական միության կողմից իր EU4Business նախաձեռնության շրջանակներում:
«Դրամաշնորհը մեզ հնարավորություն տվեց սկսել աշխատանքը, հիմնել ընկերությունը, ստեղծել առաջին աշխատատեղերը և ստեղծել անհրաժեշտ սարքավորումներով լաբորատորիա՝ ապարատային նախատիպեր ստեղծելու համար», - նշել է DataLogger-ի համահիմնադիր Ռաֆայել Ղասաբյանը:
Ղասաբյանը բացատրում է, թե ինչն է դրդապատճառ հանդիսացել իր թիմի համար. «Երբ աշխատում էինք RAFA Solutions-ում և ստեղծում անհատական լուծումներ ողջ աշխարհի տարբեր հաճախորդների համար, մենք նկատեցինք, որ անհրաժեշտ է ստեղծել տվյալների մուտքագրման համընդհանուր լուծումներ, որոնք կարող են բավարարել ամենատարբեր հաճախորդներին՝ միևնույն ժամանակ լինելով օգտագործման համար հեշտ և կազմաձևվող՝ առանց որևէ ծրագրավորման գիտելիքների»:
Ընկերությունն այժմ ստեղծում է ինչպես սարքաշարային, այնպես էլ ծրագրաշարային մասեր տվյալների մուտքագրման լուծման համար, որը վաճառվելու է մի քանի կոնկրետ ոլորտներում:
Ղասաբյանը նշեց, որ WiseLogger տեխնոլոգիան եզակի է իր տեսակի մեջ, որն ապահովում է յուրացման և օգտագործման համար շատ հարմար լուծում և չի պահանջում որևէ ծրագրավորման լեզվի իմացություն, որպեսզի օգտագործվի տարբեր սենսորների և գործարկիչների հետ:
«Մեր արտադրանքի առաջին նախատիպի հետ մենք որոշեցինք որպես հիմնական հաշվողական սարքավորում օգտագործել National Instruments sbRIO պլատֆորմը, և մենք մշակեցինք փաստացի անալոգային տվյալների հավաքագրման հարթակը: Մեր լուծման յուրահատկությունը կայանում է նաև նրանում, թե ինչպես ենք մենք պատրաստվում այն վաճառել վերջնական նմուշներն ունենալուց հետո, ինչպես նաև այն, թե ինչպես են այդ տվյալներ մուտքագրողները ծրագրավորվում և օգտագործվում», - ասաց նա:
Ղասաբյանն ասաց, որ թիմը դեռ փոքր է, քանի որ ստարտափը դեռևս գտնվում է հետազոտման և զարգացման փուլում և շատ վաճառք չի իրականացնում:
«Մենք փորձում ենք գոյատևել մեր սեփական միջոցներով: Ներկայիս թիմը կազմված է երկու հիմնադիրից և մարդկանց մի փոքր խմբից: Աշխատանքի մի մասը կատարվում է երրորդ ուժերի ներգրավմամբ», - բացատրեց նա:
Ստարտափի համար հիմնական թիրախը ԱՄՆ-ի շուկան է, թեև դիտարկվում է նաև ԵՄ-ի շուկան:
«Մեր ստարտափի տեսլականում վերջին տարիներին շատ բան է ձևավորվել, հատկապես դրամաշնորհը ստանալուց հետո, և շատ ժամանակ է հատկացվել շուկայի ուսումնասիրությանը և արտադրանքի զարգացմանը:
Այժմ մեզ համար կարևոր է հասկանալ նման արտադրանքի իրագործելիությունը, քանի որ հիմնական տարբերակի թողարկումից անմիջապես հետո մենք զգացինք, որ այն մեծ մրցակցության մեջ է մտել: Բացի այդ, առաջին վաճառքները և մեր հաճախորդներից ստացած արձագանքները թույլ տվեցին ավելի իրատեսական կանխատեսում ունենալ», - ասաց Ռաֆայել Ղասաբյանը:
Նա կանխատեսում է, որ 2019 թվականը DataLogger-ի համար ամենադժվար տարին կլինի, քանի որ այն «գործելու է գոյատևման ռեժիմում»:
Տեղեկություններ EU-SMEDA ծրագրի մասին
2017 թ.-ից ի վեր՝ «Աջակցություն ՓՄՁ զարգացմանը Հայաստանում» (EU-SMEDA) ծրագիրը, որը ֆինանսավորվում է Եվրոպական միության կողմից EU4Business նախաձեռնության շրջանակներում և իրականացվում GIZ-ի և Ձեռնարկությունների ինկուբատոր հիմնադրամի (ՁԻՀ) համագործակցությամբ, աջակցում է հայաստանյան ստարտափներին երկու տեսակի դրամաշնորհների՝ Նորարարության զարգացման համաֆինանսավորվող դրամաշնորհների (ՆԶՀԴ) և Գիտության և տեխնոլոգիաների ձեռներեցության (ԳՏՁ) դրամաշնորհների միջոցով:
