Ագրոբիզնեսի ոլորտի 11 հայկական ընկերություններ իրենց արտադրանքը ներկայացրել են սննդի եւ խմիչքների 60-րդ միջազգային ցուցահանդեսին՝ SIAL Paris 2024-ին, որը տեղի ունեցավ ս․թ․ հոկտեմբերի 19-23-ը Փարիզում: Դա հնարավոր դարձավ Միջազգային առեւտրի կենտրոնի (ITC) կողմից իրականացվող եւ Եվրոպական միության կողմից ֆինանսավորվող «Հագուստի եւ ագրոբիզնեսի կայուն արժեշղթաների կառուցում Հայաստանում» ծրագրի աջակցությամբ։
Հայկական ՓՄՁ-ները ցուցադրեցին տեղական արտադրանքի լայն տեսականին, ներառյալ՝ չրեր, թեյեր, պահածոներ, սոուսներ, քաղցրավենիքներ, շոկոլադ եւ այլն։
SIAL Paris 2024-ը ճանաչված է որպես աշխարհի խոշորագույն սննդի նորարարությունների ցուցահանդես, ինչը դարձնում է այն հիանալի հարթակ նաեւ հայկական ընկերությունների համար, որպեսզի այդ ընկերությունները լավագույնս ներկայացնեն իրենց առաջարկները:
«Այս հեղինակավոր միջոցառումը բացառիկ հարթակ ապահովեց հայկական ագրոբիզնեսի ոլորտի ընկերություններին՝ խթանելու իրենց բարձրորակ, բնական արտադրանքը, որը սերում է երկրի հարուստ գյուղատնտեսական ժառանգությունից: Մասնակցելով այս խոշորագույն ցուցահանդեսին՝ հայկական ՓՄՁ-ները նպատակ ունեն ամրապնդել իրենց ներկայությունը միջազգային շուկայում, ստեղծել արտահանման հնարավորություններ եւ աշխարհին ներկայացնել հայկական յուրահատուկ բազմազան համերը», — ասվում է Հայաստանում ԵՄ պատվիրակության ֆեյսբուքյան գրառման մեջ։
Սա լավ հնարավորություն էր հայաստանյան ՓՄՁ-ների համար առավել լավ հասկանալու եվրոպական շուկայի պահանջները, այնտեղ մուտք գործելու ռազմավարությունը եւ բացահայտելու պոտենցիալ բիզնես հնարավորությունները:
