Հայաստանյան ընկերությունները Գերմանիայի Նյուրնբերգ քաղաքում կայացած օրգանական ապրանքների առաջատար տոնավաճառում՝ BioFach 2019-ում ապահովել են առևտրային գործարքներ չորացրած և պահածոյացված մրգերի, ջեմերի, հյութերի և խոտաբույսերի գործարքների համար:
Եվրոպական միության կողմից ֆինանսավորվող, EU4Business նախաձեռնության շրջանակներում Միջազգային առևտրի կենտրոնի «Առևտրի համար պատրաստ» ծրագրի աջակցությամբ փետրվարի 14-ից 16-ը տեղի ունեցած տոնավաճառին մասնակցում էին չորս հայկական ընկերություններ: Օրգանական գյուղատնտեսության աջակցության նախաձեռնության (ՕԳԱՆ) հետ միասին «Առևտրի համար պատրաստ» ծրագիրն օգնեց կազմակերպել հայաստանյան տաղավարը, մշակել մարքեթինգային նյութերը և կազմակերպել B2B հանդիպումներ տոնավաճառի ժամանակ:
Տոնավաճառի ընթացքում յուրաքանչյուր ընկերություն ավելի քան քսան B2B հանդիպում ունեցավ առաջատար եվրոպական գնորդների հետ, այդ թվում նաև՝ Ֆրանսիայից, Գերմանիայից և Միացյալ Թագավորությունից գնորդների հետ:
«ՄԱԿ-ի «Առևտրի համար պատրաստ» ծրագրի շնորհիվ մենք կարողացանք մեր արտադրանքը ներկայացնել ամենակարևոր սննդի տոնավաճառներից մեկում և գտնել նոր գնորդներ: Դա զարմանալի փորձ էր», - ասաց «Արարատ» սննդի գործարանի միջազգային հարաբերությունների և արտահանման բաժնի պետ Մարինա Խաչատուրյանը:
Միջոցառման նախապատրաստական աշխատանքներին մասնակցող ընկերությունները մասնակցել են նաև «Միջազգային ցուցահանդեսին արդյունավետ մասնակցություն» դասընթացին, որը կազմակերպվել էր Հայաստանի փոքր և միջին ձեռնարկատիրության զարգացման ազգային կենտրոնի կողմից:
Արևելյան գործընկերություն. Առևտրի համար պատրաստ Ծրագիրը փոքր ու միջին ձեռնարկություններին (ՓՄՁ-ներ) օգնում է մուտք գործել նոր շուկաներ՝ կենտրոնանալով ԵՄ-ի վրա՝ ՓՄՁ-ներին օգնելով բացահայտել և պահպանել որակի չափանիշներն ու ստանդարտները՝ ի համապատասխանություն միջազգային պահանջներին, ինչպես նաև նրանց կապելով արժեքի ստեղծման շղթաների գնորդների հետ և տրամադրելով կլաստերային աջակցություն:
