Արևելյան գործընկերության (ԱլԳ) 5-րդ գագաթաժողովը տեղի կունենա Բրյուսելում նոյեմբերի 24-ին՝ ուրբաթ օրը, և կհամախմբի ԵՄ անդամ պետությունների և Արևելյան վեց գործընկեր երկրների պետությունների ու կառավարությունների ղեկավարներին: Քննարկման ենթակա առաջնահերթ ոլորտներից են տնտեսական զարգացումը և ավելի բարենպաստ շուկայական հնարավորությունները:
Ղեկավարները կքննարկեն հետագա համագործակցության ուղիները, ինչպես նաև կարձանագրեն 2015 թվականին Ռիգայում կայացած վերջին գագաթաժողովից հետո ձեռք բերված արդյունքները՝ ուշադրությունը կենտրոնացնելով Արևելյան գործընկերության վեց երկրների քաղաքացիներին տրամադրված շոշափելի օգուտների վրա:
Գագաթաժողովի ընթացքում կքննարկվեն Ռիգայում համաձայնեցված չորս գերակա ոլորտներում համագործակցությունն առավել ամրապնդելու ուղիները.
- ավելի հզոր տնտեսություն՝ տնտեսական զարգացում և ավելի բարենպաստ շուկայական հնարավորություններ
- ավելի լավ կառավարում՝ հաստատությունների և արդյունավետ կառավարման ամրապնդում
- ավելի սերտ փոխկապակցվածություն՝ փոխադարձ կապերի ընդլայնում, մասնավորապես՝ տրանսպորտի և էներգիայի ոլորտներում
- ավելի հզոր հասարակություն՝ շարժունակության և մարդկանց միջև շփումների ընդլայնում
ԵՄ-ն «Արևելյան գործընկերություն. հիմնական գերակայությունների և թիրախային արդյունքների շեշտադրում» վերնագրով աշխատանքային փաստաթղթում առանձնացրել է նշված չորս ոլորտներում 2020 թվականի համար նախատեսվող 20 թիրախային արդյունք: Զեկույցը առաջին անգամ ներկայացվել է 2016 թ. դեկտեմբերին և վերանայվել 2017 թ. հունիսին:
«20 թիրախային արդյունք մինչև 2020 թ.» զեկույցի համաձայն` ԵՄ-ն պարտավորվում է քայլեր ձեռնարկել տնտեսական զարգացման և շուկայական հնարավորությունների ուղղությամբ՝ գործընկեր երկրներին աջակցելով հետևյալ ոլորտներում.
-
բազմազան և կենսունակ տնտեսությունների ստեղծում՝ նոր ոլորտներում աշխատատեղերի ստեղծման, ներդրումների գրավման և աշխատունակության խթանման համար.
-
մակրոտնտեսական կայունություն.
-
տնտեսական անցումային գործընթացի խթանում՝ նպատակ ունենալով ստեղծելու գրավիչ միջավայր, ներդրումների և բիզնեսի համար խաղի հավասար պայմաններ, ինչպես նաև բարելավելու գործընկեր երկրների՝ ԵՄ-ի և միմյանց հետ առևտրային հնարավորություններից օգտվելու կարողությունները:
Արևելյան գործընկերությունը մեկնարկել է 2009 թվականին՝ նպատակ ունենալով խթանելու քաղաքական ասոցացումն ու տնտեսական ինտեգրումը ԵՄ-ի և Արևելյան Եվրոպայի վեց գործընկեր երկրների միջև՝ Ադրբեջանի, Բելառուսի, Հայաստանի, Մոլդովայի, Վրաստանի և Ուկրաինայի:
ԵՄ-ն EU4Business նախաձեռնության շրջանակներում աջակցություն է տրամադրում Արևելյան գործընկեր երկրների մասնավոր հատվածին՝ ջանալով ստեղծել ավելի բարենպաստ գործարար միջավայր՝ միաժամանակ տրամադրելով ձեռնարկատիրության մասին մասնագիտական խորհրդատվություն և բարելավելով ֆինանսների հասանելիությունը ՓՄՁ-ների համար: Նախաձեռնության նպատակն է բացահայտել տարածաշրջանի ՓՄՁ-ների հսկայական ներուժը՝ դրանով նպաստելով տնտեսական աճին և աշխատատեղերի ստեղծմանը:
