Հայաստանի մարզերից ավելի քան 150 երիտասարդներ կառավարության և միջազգային կազմակերպությունների ներկայացուցիչների հետ միասին մասնակցեցին EU4Business-SMEDA ծրագրի կողմից նախորդ ամիս Գյումրիում կազմակերպված «Մարզերի հզորացումը բարձր տեխնոլոգիաների խթանմամբ» երկօրյա համաժողովին:
Գյումրին՝ Հայաստանի մեծությամբ երկրորդ քաղաքը, նպատակ ունի քաղաքի կենտրոնում տեղակայված իր տեխնոլոգիական կենտրոնով և բարձր տեխնոլոգիաների ոլորտում գործող բազմաթիվ ընկերություններով դառնալու Հայաստանի տեղեկատվական տեխնոլոգիաների մայրաքաղաքը:
«Շատ երիտասարդներ, ովքեր պատրաստվում էին արտագաղթել, Գյումրու տեխնոլոգիական կենտրոնի բացումից հետո որոշեցին մնալ և ծրագրավորում սովորել: Սկզբում ոչ ոք չէր հավատում, որ այս ծրագիրն իրականություն կդառնա»,- նշել է Գյումրու տեխնոլոգիական կենտրոնի (ԳՏԿ) բիզնես զարգացման մենեջեր Ամալյա Եղոյանը:
Աշխատատեղերի ստեղծման կենտրոն
Հիմնադրումից ի վեր՝ ԳՏԿ-ն արդեն ստեղծել է շուրջ 200 աշխատատեղ, ունի մոտ 100 շահառու կազմակերպություն և տարեկան պատրաստում է 500 մասնագետ: Կենտրոնում գործում են 25 տեղական և միջազգային կազմակերպություններ:
Համաժողովի հիմնական նպատակն էր խթանել Հայաստանի մարզերի տնտեսական զարգացումը՝ վերլուծելով փոքր քաղաքների համար մշակված հաջողված միջազգային ռազմավարությունները, որոնք կարող են իրականացվել Հայաստանում: Վարչապետ Կարեն Կարապետյանը, ով համաժողովի պատվավոր հյուրն էր, ընդգծեց տեխնոլոգիաների միջոցով Հայաստանի տնտեսությունը զարգացնելու կարևորությունը՝ շեշտադրելով այդ գործընթացում մարզերի ակտիվ ներգրավվածությունը:
Բարձր տեխնոլոգիաները՝ տնտեսության խթան
«Մենք հետամուտ ենք Հայաստանում զարգացնելու բարձր տեխնոլոգիաների ոլորտը՝ որպես մեր տնտեսությունն առաջ մղող ուղղություններից մեկը, որը ներդրումների ներգրավման և արտահանման մեծ ներուժ ունի: Միաժամանակ, Հայաստանի հզորացման տեսլականի մեջ առանցքային կարևորություն ունի մարզային զարգացումը, առանց որի չենք կարող զարգացած երկիր ունենալ: Այս երկուսի համադրումը ցանկալի արդյունք կարող է ապահովել», - ասաց վարչապետ Կարապետյանը:
ԵՄ-ն Հայաստանի առաջատար ներդրումային ու տնտեսական գործընկերն է, ինչը վերահաստատվեց այս տարվա առաջին ինն ամիսների ընթացքում. Եվրոպական միության երկրների հետ ապրանքաշրջանառությունն աճել է շուրջ 25 տոկոսով: Վերջերս ԵՄ-ն Հայաստանին տրամադրել է 25 մլն եվրոյի դրամաշնորհ՝ թվայնացման համապարփակ համակարգ գործարկելու համար:
«Լիովին հեղափոխական»
«Կարծում եմ՝ էլեկտրոնային կառավարման ներդրումը Հայաստանում լիովին հեղափոխական է: Հայաստանում մարդիկ տեղյակ չեն, թե ինչ է կատարվում էլեկտրոնային կառավարման ոլորտում: Այն, ինչ կատարվում է այստեղ՝ Հայաստանում, ոչ միայն լավ է երկրի համար, այլև աշխարհում առաջնային տեղ է զբաղեցնում: Էլեկտրոնային կառավարման այս փոխակերպման գործընթացը, որի միջով անցնում է Հայաստանը, մի քանի տարի անց հայտնի կդարձնի երկիրը և կդասի էլեկտրոնային կառավարման ոլորտում եվրոպական երկրների առաջատարների շարքում», - նշել է ԵՄ պատվիրակության համագործակցության բաժնի ղեկավար Հոա-Բին Աճեմյանը:
Միջոցառումն իրականացվել է միջազգային կազմակերպությունների և EU4Business-ի SMEDA («Աջակցություն փոքր և միջին ձեռնարկությունների զարգացմանը Հայաստանում») ծրագրի հետ համագործակցությամբ, որը համաֆինանսավորվում է Եվրոպական միության և Գերմանիայի Տնտեսական համագործակցության և զարգացման դաշնային նախարարության (BMZ) կողմից և իրականացվում է GIZ-ի «Մասնավոր հատվածի զարգացում Հարավային Կովկասում» ծրագրով:
SMEDA-ի ուշադրության կենտրոնում Հայաստանի ողջ տարածքում, այդ թվում՝ բոլոր մարզերում, գործող փոքր և միջին ձեռնարկություններն են:
«Մարզերի ընկերությունները շատ կարևոր են: Մենք արդեն խոսել ենք երկրի կրթական համակարգի և տնտեսական հզորության մեծ ներուժի մասին: Այս ծրագրի միջոցով փորձում ենք բարելավել մարզերի տնտեսական ցուցանիշները: Ծրագիրը հիմնականում ուղղված է տնտեսական կլաստերների մշակման ու կառավարման բարելավմանը: Երբ խոսում ենք տնտեսական կլաստերների մասին, նկատի ունենք ինկուբատորները, տեխնոպարկերը, տեխնոլոգիական կենտրոնները այստեղ՝ Գյումրիում, և Վանաձորում, ինչպես նաև Հայաստանի ազատ տնտեսական գոտիները», - նշել է SMEDA-ի թիմի ղեկավար Էվա Նահերը:
«Ցուցադրիր ներուժդ»
Էվա Նահերը երիտասարդներին կոչ արեց «ցուցադրել իրենց ներուժը» և «միավորել ջանքերը համախոհ գործընկերների հետ»՝ որպես բիզնեսում հաջողության հասնելու միջոց:
«Միավորվեք և դարձեք ավելի հզոր: Եթե մենակ չեք, ապա ավելի հեշտ է ներդրողներ և ներդրումներ ներգրավելը: Միջազգային փորձում բազմաթիվ օրինակներ կան, երբ մի առանձին ընկերության չի հաջողվել ներդրողներ ներգրավել, սակայն միավորվելով՝ նրանք կարողացել են ավելի մեծ ձեռքբերումներ ունենալ այն ոլորտում, որտեղ հայտնի են եղել, և դրա շնորհիվ գործընկերներ գտնել: Ուստի, միավորվեք և ցուցադրեք ձեր ունեցածը», - նշել է նա:
Համաժողովի առաջին օրվա ընթացքում քննարկված հիմնական թեմաները, այն է՝ մտածելակերպի փոփոխություն, հաջող ձեռնարկության ստեղծում և մարզերի զարգացում, մասնակից երիտասարդների հետ գործնականում կիրառվեցին երկրորդ օրն անցկացված տարբեր աշխատաժողովների ընթացքում:
EU4Business-ի SMEDA ծրագիրն աջակցում է գործարարության և ներդրումային միջավայրի բարելավմանը Հայաստանի ՓՄՁ-ների համար: Այն նպատակ ունի ամրապնդելու մասնավոր հատվածը, աջակցելու ՓՄՁ-ի համակարգման մեխանիզմներին և խթանելու հետազոտական հաստատությունների ու մասնավոր հատվածի միջև կապերը, ինչպես նաև ապահովելու ֆինանսական միջոցների հասանելիություն ՓՄՁ-ների համար:
