You are using an outdated browser. Please upgrade your browser to improve your experience.
ՍԿԻԶԲ

Եվրամիությունն ու ՎԶԵԲ-ը օգնել են «ՕգմենթԱր» ընկերությանը ապագայի համար ծրագրեր մշակել

Ընդամենը մի քանի տարի առաջ եռաչափ տպագրությունը ավելի շատ կիրառվում էր արդյունաբերական վայրերում, քան մարդկանց տներում: Ոլորտի արագ էվոլյուցիան և շուկայի զարգացումը նշանակում են, որ այժմ 3D տպիչները սպառողներին հասանելի են մատչելի գներով, ուստի յուրաքանչյուր մարդ կարող է ստեղծել իր սեփական խոհանոցային պարագաները, խաղալիքները և «Սարքիր ինքդ» գործունեության համար գործիքները:

Հայաստանում «ՕգմենթԱր» ընկերության թիմը, որին աջակցում են ՎԶԵԲ-ն ու Եվրամիության  EU4Business նախաձեռնությունը՝ Խորհրդատվություն փոքր բիզնեսին ծրագրի միջոցով, տեղական առաջին ընկերություններից էր, ով ներմուծեց  եռաչափ տպագրության թրենդը։

Քանի որ ընկերության ապրանքանիշը հնարագիտությունն է, գործադիր տնօրեն և ծրագրային ապահովման ինժեներ Արթուր Խոջաբաղյանն ու նրա թիմը չհուսահատվեցին, երբ կորոնավիրուսային համավարակը հասավ Հայաստան։ Փոխարենը, նրանք սկսեցին մտածել, թե ինչպես կարելի է այս չափազանց բարդ իրավիճակին առավել արդյունավետ արձագանքել, և ոչ միայն իրենց բիզնեսի համար, այլ ընդհանրապես:

Նախնական գաղափարն այն էր, որ մարդիկ կարող են ստեղծել և փոխարինել առարկաները հենց իրենց տանը՝ անվտանգ միջավայրում, արգելափակումների կամ կարանտինի պայմաններում: 3D տպիչները, որոնք արտադրում է ընկերությունը, հիանալի լուծում են ներկայիս՝ «Մնա տանը» ապրելակերպի համար: Նման տպիչով, եթե չունեք անհրաժեշտ առարկան կամ ինչ-որ բան կոտրվում է, պարզապես պետք է համացանցից ֆայլ ներբեռնել և պատրաստել մի նոր առարկա՝ առանց տնից դուրս գալու:

«COVID-19 համավարակի պայմաններում ավելի ու ավելի ենք գիտակցում եռաչափ տպագրության հնարավորությունները: Դա, անշուշտ, կնպաստի շուկայում ավելի մեծ պահանջարկի առաջացմանը և կարագացնի ոլորտի զարգացումը: Մեր նպատակն է․ արագորեն ամրապնդել մեր բրենդը և դրա ճանաչումը, ինչպես նաև մեր ջանքերը ներդնել  արտահանման ուղղությամբ։ Միևնույն ժամանակ, մենք վստահ ենք, որ Հայաստանում ավելի շատ մարդիկ կսկսեն գնել եռաչափ տպիչներ: Մենք արդեն իսկ վաճառքի ավելի բարձր ցուցանիշներ ենք գրանցել», - ասել է պարոն Խոջաբաղյանը:

«ՕգմենթԱր» ընկերությունը իր առցանց հարթակներում, այդ թվում՝ սոցիալական լրատվամիջոցներում, տրամադրում է եռաչափ տպագրության անվճար դասընթացներ և առարկաներ ստեղծելու վերաբերյալ առաջարկներ: Եռաչափ տպագրության մասին մարդկանց կրթելը կարևոր է ընկերության համար, որտեղ աշխատում է 21 երիտասարդ ինժեներ: Ընկերության ռազմավարությունն այն է, որ երեխաներն ու դպրոցականները ներգրավվեն ուսման որոշակի ծրագրերում: Նրանք համագործակցում են «Արմաթ» ինժեներական լաբորատորիաների հետ։ Սա ավագ դպրոցներում գիտության, տեխնոլոգիայի, ճարտարագիտության և մաթեմատիկայի խթանմանն ուղղված՝ արտադասարանական կրթության ազգային ծրագիր է։ «ՕգմենթԱր» ընկերությունը ստեղծել է կրթական տպիչ, որն «ինքնավերարտադրվում է» և տպում նոր 3D տպիչ, որի երկակի նպատակը յուրաքանչյուր ուսանողի սովորեցնելն է, թե ինչպես օգտագործել սարքը և ինքդ քեզ ապահովել նման սարքով։  

Հայաստանում շուրջ 575 դպրոց օգտվում է այս դասընթացներից: Ներկայումս դպրոցները փակ են, բայց մի նախագծի համար, որի մի մասը ֆինանսավորվում է ԵՄ-ի կողմից, իսկ մյուս մասը՝ «ՕգմենթԱր»-ի կողմից, ՎԶԵԲ-ն ընտրել է բիզնես խորհրդատու, ով կաշխատի «ՕգմենթԱր»-ի հետ՝ այդ գործունեությունը խթանելու ու ևս 700 դպրոց ներգրավելու և դասընթացները տարածելու թե երկրում, և թե՛ երկրից դուրս:

Սակայն հենց այս պահին կա մի առավել հրատապ խնդիր, որը կարող է մասամբ լուծվել եռաչափ տպագրության օգնությամբ․դա անձնական պաշտպանիչ սարքավորումների և, մասնավորապես, հատուկ պաշտպանիչ ակնոցների և դեմքի վահանների պակասն է, իսկ բժիշկներն ու բուժքույրերը պետք է օգտագործեն դրանք COVID-19-ով պացիենտների հետ հիվանդանոցային հատուկ բաժանմունքներում աշխատելիս կամ մեկուսացման մեջ գտնվող հիվանդներին բուժօգնություն ցուցաբերելիս։

Պ-ն Խոջաբաղյանը, ժամանակ չվատնելով, որոնել էր կորոնավիրուսի հետ կապված բժշկական պարագաների գծագրերը, որոնք բաց են և հասանելի։ Ինժեներները հասանելի են դարձրել դեմքի պաշտպանիչ վահանի մոդելի դետալները, որոնք կարելի է տպել և կյանքեր փրկել: Միևնույն ժամանակ Երևանի պետական բժշկական համալսարանի դեղագործության ֆակուլտետը դիմել էր «ՕգմենթԱր» ընկերությանը համագործակցության առաջարկով և ուղարկել վահանների և ակնոցների նմուշներ: Զգուշավոր և հաջողված փորձարկումների արդյունքում «ՕգմենթԱր» ընկերությունն արտադրեց այնպիսի պարագաներ, որոնք հավանություն ստացան և ետ ուղարկվեցին նրանց։

«Մենք չէինք կարող անտարբեր մնալ տեղի ունեցածի հանդեպ և սկսեցինք տարբեր մեթոդներ ուսումնասիրել և փորձարկել: Սա մեզ թույլ տվեց արագորեն գտնել արդյունավետ միջոցները և կիրառել դրանք: Մենք նաև կիսվեցինք մեր փորձով, որպեսզի մյուսները, ովքեր ունեն 3D տպիչներ, կարողանան մասնակցել: «Արմաթ» լաբորատորիաներ կազմակերպությունը միացավ նախագծին`իր ամբողջ կարողությամբ: Մենք հավատացած ենք, որ որոշ չափով մենք բոլորս մեր համեստ դերակատարումն ենք ունեցել վարակի տարածումը մեղմելու գործընթացում», - ասել է պարոն Խոջաբաղյանը:

Երբ դետալները հասանելի դարձան համացանցում, այլ լաբորատորիաները՝ «Արմաթի» հետ համագործակցությամբ, սկսեցին տպագրություն անել: Մինչ այժմ արտադրվել է ավելի քան 4,000 դիմակ և պաշտպանիչ ակնոց, որոնք և նվիրաբերվել են Հայաստանում 50 հիվանդանոցների։

Այս հաջողությունը ակնհայտորեն ոգեշնչել է ընկերությանը և նրա աշխատակիցներին: Այժմ նրանք աշխատում են ֆայլերի նախագծման վրա՝ արհեստական շնչառության սարքեր տպելու համար:

«Եվրամիությունը շարունակում է հավատարիմ մնալ ՓՄՁ-ներին աջակցելու և Հայաստանում աշխատատեղեր ստեղծելու իր հանձնառությանը` ի պատասխան COVID-19-ի հետևանքով առաջացած ճգնաժամի: Եվրոպայի Թիմի գործընկերների՝ օրինակ, ՎԶԵԲ-ի հետ միասին, ԵՄ-ն շարունակում է կանգնել հայ ձեռնարկատերերի կողքին ՝ խթանելով բիզնես հնարավորությունները և նորարարությունը այս դժվարին ժամանակներում», - ասել է Հայաստանում ԵՄ դեսպան Անդրեա Վիկտորինը:

«ՎԶԵԲ-ը հպարտանում է այն փաստով, որ բազմաթիվ փոքր ձեռնարկություններ, ում մենք աջակցում ենք Եվրամիության կողմից ֆինանսավորման օգնությամբ, այսքան արագ են արձագանքում կորոնավիրուսային համավարակի մարտահրավերներին և դիմակայում դրանց», - ասել է Հայաստանում ՎԶԵԲ-ի ղեկավար Դիմիտրի Գվինդաձեն:

Ամենավերջինը ՀԱՋՈՂՈՒԹՅԱՆ ՊԱՏՄՈՒԹՅՈՒՆՆԵՐ
16.04.2021
Հայաստանի հեռավոր շրջաններում աղքատություն բարձր մակարդակը տարածված իրողություն է, քանի որ գյուղատնտեսությունից զատ տնտեսական այլ հնարավորությունները սակավաթիվ են, գործազրկության ցուցանիշները բարձր են ազգային միջին մակարդակից։
15.03.2021
«Սաթենի» ընկերության զարգացմանը նպաստել է նաև «Առևտրի համար պատրաստ ծրագիրը», որի շրջանակում ստեղծվել է նոր ապրանքատեսականու համար բրենդինգ և փաթեթավորում:
10.03.2021
Շախմատային ամենաուժեղ ազգերից մեկը Հայաստանն է՝ մի փոքրիկ երկիր, որտեղ կան հայտնի գրոսմայստերներ, ինչպիսին էր Տիգրան Պետրոսյանը կամ «Երկաթե Տիգրան»-ը: Ինչպե՞ս է դա անում Հայաստանը. պահպանելով շախմատի լավագույն ավանդույթները աշխարհում ամենահավակնոտ դպրոցական շախմատային...

Քուքիներ
Այս կայքն օգտագործում է թխուկներ՝ ձեզ առաջարկելով կայքը թերթելու ավելի լավ հնարավորություններ: Կարդալ ավելին
Ես մերժում եմ թխուկները
Ես ընդունում եմ թխուկները