Ամեն ինչ սկսվեց վիրահատությունից: Րաֆֆին՝ Կանադայում ծնված վեբ ծրագրավորող, ով Հայաստան հայրենադարձեց 2011 թվին, երևանյան մի հիվանդանոց էր ընդունվել երկարատև առողջական խնդրի բուժման համար, որը հնարավոր չէր եղել բուժել Կանադայում: Նրան ուրախացրեց ոչ միայն բուժման արդյունքը, այլև զարմացրեց գնի ու որակի հարաբերակցությունը: «Հենց այդ ժամանակ էլ որոշեցի ստեղծել ծրագրային հավելված, որը ողջ աշխարհի այլ մարդկանց կօգնի մատչելի բուժում ստանալ»,- նշում է Րաֆֆին:
Արդյունքում ստեղծվեց GetTreated-ը՝ թվային ստարտափ, որը նախատեսված է ամբողջ աշխարհի հիվանդների համար ամենամատչելի և քիչ ժամանակատար բուժման հնարավորությունները գտնելու համար: «Ստարտափը սկզբում ֆինանսավորվում էր մեր վեբ ծրագրավորման ստուդիայի միջոցով ստացած եկամուտներով»,- բացատրում է Րաֆֆին: «Երբ սկսենք գործունեություն ծավալել այլ երկրներում, կփնտրենք ֆինանսավորման այլ աղբյուրներ»: Ահա այս փուլում օգնության ձեռք մեկնեց EU4Business-ը:
GetTreated-ը 15 հայկական ստարտափներից մեկն էր, որը վերջերս Բեռլինում ներկայացվեց Գերմանիայի գործարար շրջանակներին՝ «Հայաստանյան ստարտափների ակադեմիա Բեռլինում» (ASAB) միջոցառմանը, որը կազմակերպվել էր EU4Business-ի SMEDA (Աջակցություն ՓՄՁ զարգացմանը Հայաստանում) ծրագրի կողմից:
Կապերի հաստատում ներդրողների և խորհրդատուների հետ
«Մենք ակնկալում ենք կապեր հաստատել այլ ստարտափների, ներդրողների և խորհրդատուների հետ: Ավելին՝ ցանկանում ենք խորհրդատվություն ստանալ այն մասին, թե ինչպես պատշաճ կերպով կազմակերպենք մեր ստարտափը՝ համաշխարհային մասշտաբով գործունեություն ծավալելու համար»,- նշել է ընկերությունը իր նորարարության ներկայացման ելույթում՝ նախքան 2017 թ սեպտեմբերի 3-10-ը կայացած ակադեմիային մասնակցելը:
Ստարտափների ակադեմիան Բեռլինում ներառում էր քառօրյա ինտենսիվ դասընթացներ ներդրումների համար պատրաստվածության, բիզնեսի մոդելավորման, նորարարական գաղափարների ներկայացման, շուկայավարման և վաճառքի թեմաներով, ինչպես նաև անհատական հանդիպումներ հավանական գործընկերների, հաճախորդների և ներդրողների հետ:
Րաֆֆին ծնվել և մեծացել է Կանադայում` իռլանդական ծագմամբ կանադացի հոր և սիրիահայ մոր ընտանիքում: Նա բազմաթիվ անգամ Երևան էր այցելել նախքան 2011 թվին վերջնականապես Հայաստան հայրենադարձելը և Երևանում վեբ ծրագրավորման հաջող ընկերություն հիմնելը:
GetTreated-ը 2016 թվին գործարկվեց որպես նախատիպ և պաշտոնապես գրանցվեց Երևանում 2017 թ. հունվարին իր երկու հիմնադիրների՝ Րաֆֆի Էլիոթի և Շաղիկ Ագիլյանի կողմից: Թիմն այժմ բաղկացած է 3 անձից:
Մատչելի բուժման հնարավորություններ արտերկրում
Րաֆֆին վստահությամբ հայտնում է իր նորարարության ներկայացման ժամանակ. GetTreated-ը «հարթակ՝ որպես ծառայություն» է (Platform as a Service, PaaS), որը հիվանդներին օգնում է ծախսարդյունավետ ու քիչ ժամանակատար բուժման հնարավորություններ գտնել արտերկրում: Այն ավտոմատ կերպով նշանակում է բժշկական տեսակցությունները, վիրահատությունների ամսաթվերը, չվերթերը, հյուրանոցները և ավելին՝ հիվանդներին տրամադրելով ավելի հեշտ, անվտանգ ու լավ մշակված այլընտրանքային առաջարկներ, քան՝ բժշկական տուրիստական գործակալությունները»:
Հաշվի առնելով «Երևանում գործող մոտ 100 տեխնոլոգիական ստարտափների ... և Արևելյան Եվրոպայի մի շարք լավագույն ծրագրավորողների առկայությունը», ինչպես նաև կյանքի ցածր արժեքն ու բարենպաստ գործարար միջավայրը՝ Րաֆֆին Հայաստանը համարում է իդեալական սկզբնակետ, որտեղից կարող է սկսել իր ընկերության աճը:
GetTreated-ն ակնկալում է մուտք գործել բժշկական տուրիզմի հսկայական համաշխարհային շուկա, որը տարեկան կազմում է ավելի քան 50 միլիարդ ԱՄՆ դոլար և աճում է տարեկան մինչև 10%-ով: «Մենք մտադիր ենք զարգացնել այս ընկերությունը՝ միջազգային բժշկական ոլորտում լուրջ դերակատար դառնալու համար՝ միևնույն ժամանակ մնալով զուտ հայաստանյան ընկերություն»,- նշել է Րաֆֆին նախքան Բեռլինի ակադեմիային մասնակցելը:
Շնորհիվ EU4Business-ի և SMEDA ծրագրի՝ GetTreated-ն այժմ մի քայլ ավելի մոտ է իր նպատակների իրականացմանը:
EU4Business-ի SMEDA ծրագիրն աջակցում է գործարարության և ներդրումային միջավայրի բարելավմանը Հայաստանի ՓՄՁ-ների համար: Այն նպատակ ունի ամրապնդելու մասնավոր հատվածը, աջակցելու ՓՄՁ-ի համակարգման մեխանիզմներին և խթանելու հետազոտական հաստատությունների ու մասնավոր հատվածի միջև կապերը, ինչպես նաև ապահովելու ֆինանսական միջոցների հասանելիություն ՓՄՁ-ների համար:
