You are using an outdated browser. Please upgrade your browser to improve your experience.
ՍԿԻԶԲ

Յանա Պողոսյանը գրաֆիկական պատկերագրանցման միջոցով նկարում է այն, ինչ մարդիկ տարբեր դասընթացների ու ժողովների ժամանակ քննարկում են: Յանան մարդկանց խոսքերն ու մտքերը վերածում է պատկերների, քննարկմանը զուգահեռ այդ պատկերների ցուցադրություն կազմակեպում, ինչը հնարավորություն է տալիս տեղեկատվությունն ավելի հեշտ ընկալել: Այս մեթոդը Հայաստանում դեռ լայն տարածում չունի, բայց, ինչպես Յանան է ասում, հեռանկարային է և աշխարհի շատ երկրներում է տարածված:

Գրաֆիկական դիզայնի մասնագետ Յանա Պողոսյանը արդեն երկու տարի է՝ նաև գրաֆիկական պակերագրանցման (gaphicrecording) աշխատանքով է զբաղվում: Նա այս հմտությունը ձեռք է բերել Եվրամիության համաֆինանսավորմամբ իրականացվող Աջակցություն ՓՄՁ Զարգացմանը Հայաստանում (EU SMEDA) ծրագրի շրջանակներում, որը ֆինանսավորվում է Եվրամիության կողմից: 2017 թվականին մասնակցելով այս դասընթացին, ինչպես ինքն է ասում, մեկ շաբաթում յուրացրել է այդ հետաքրքիր մասնագիտությունը:

Այսօր արդեն նա մտադիր է սեփական դասընթացներն անցկացնել արտերկրում:

«Քանի որ այն շատ տարածված չէ Ռուսաստանում ու Վրաստանում, ես պլանավորում եմ այնտեղ թրեյնինգներ անցկացնել առաջիկայում»,- մեզ հետ զրույցում ասում է Յանա Պողոսյանը:

Նրա խոսքով՝ այս մասնագիտությունն իրեն մեծ հնարավորություններ է տալիս արտերկրում աշխատելու համար, կարող է արտերկրից պատվերներ ընդունել ու իրականացնել: Նա գրաֆիկական պատկերագրանցումն իրականացնում է եռալեզու՝ ռուսերեն, հայերեն և անգլերեն:

«Դասընթացի շրջանակներում մեկ շաբաթվա ընթացքում մեզ սովորեցրին, թե ինչ է  գրաֆիկական պատկերագրանցումը: Ճիշտն ասած, այնքան սիրեցի այդ մասնագիտությունը, որ հիմա շատ մեծ սիրով զբաղվում եմ այս գործով: Իհարկե, հիմա Հայաստանում այդքան մեծ պահանջարկ չունի այս մասնագիտությունը, սակայն գնալով տարածում է գտնում»,- ասաց նա:

Յանան չի բացառում, որ աշխատանքի բարելավման արդյունքում ոլորտի ստարտափ կհիմնի, այժմ ուսումնասիրում է շուկան:

Պետք է անընդհատ ինքնակրթվել, նոր գիտելիքներ ունենալ, ասում է Յանա Պողոսյանը: Հայաստանի աշխատանքային շուկան, ըստ նրա, այնպիսին է, որ յուրաքանչյուր լավ մասնագետ կարող է իր տեղը գտնել:

«Չպետք է վախենալ նոր բան սովորելուց: Եվ ես այսօր կարող եմ ասել, որ այսօրինակ ծրագրերը մասնագետներին հնարավորություն են տալիս ավելի կայանալ: Երբ մարդիկ տեսնում են իմ աշխատանքը, շատ են հավանում, բայց ես զգում եմ, որ իրենք համարձակություն չունեն նույնը կրկնելու»,- հավելում է նա: Յանան երիտասարդներին կոչ է անում համարձակ կյանքի կոչել իրենց գաղափարները:

EU SMEDA ծրագրի շնորհիվ իր հմտություններն է բարելավել նաև տեղեկատվական տեխնոլոգիաների ոլորտի մասնագետ Արև Համբարձումյանը: Նա այն երիտասարդ մասնագետներից է, ով կարծում է, որ Հայաստանի աշխատաշուկայում լավ հնարավորություններ կան երիտասարդների համար: Նա ոլորտում գործող երկու ընկերությունների տեխնիկական տնօրենն է: Ասում է, որ ոլորտում որակյալ կադրերի պակաս կա:

Արև Համբարձումյանը EU-Smeda-ի շրջանակներում, որպես ընկերություններից մեկի ներկայացուցիչ, մասնակցել է Hannover Messe 2018 ցուցահանդեսին:

«Մեր ընկերությունը երկու ուղղությամբ է աշխատում, մեկը նյութերի թեստավորման սարքերի ավտոմատացումն է, իսկ մյուսը՝ կրթական ոլորտում ծրագրեր ենք ստեղծում: Hannover Messe 2018 ցուցահանդեսը մոտ մեկ շաբաթ տևեց, դրանից զատ մեկ շաբաթ մենք Գերմանիայի տարբեր քաղաքներով ճանփորդում էինք և հանդիպում տաբեր կազմակերպությունների հետ՝ կապեր հաստատելու համար: Դա փորձի փոխանակման մեծ հնարավորություն էր ինձ համար»,- ասում է նա:

Hannover Messe ցուցահանդեսը տարբեր երկրների մասնագետներին հնարավորություն է տալիս հավաքվել մեկ վայրում և գործընկերային կապեր հաստատել: Այն Եվրոպայում տեխնոլոգիական ոլորտի ամենամեծ ցուցահանդեսներից է, որն անցկացվում է ամեն տարի:

«Մենք հնարավորություն ունեցանք ծանոթանալ, թե աշխարհում տեխնոլոգիական զարգացումն ինչ մակարդակի է, մեր մրցակիցներն ինչ պրոդուկտներ ունեն: Բացի դրանից, նաև հնարավորություն ունեցանք ցուցահանդեսում ներկայացնել մեր պրոդուկտները»,- ասաց նա:

«EU4Business» ծրագրի շրջանակներում նաև դրամաշնորհ է հատկացվել նորաստեղծ կազմակերպությանը՝ որպես ստարտափ, որտեղ աշխատում է Արեւը: Ստացված ֆինանսական աջակցությունը, նրա խոսքով, էապես նպաստեց նորաստեղծ ընկերության զարգացմանը:

«Մենք սկզբնական փուլում էինք, բայց կարողացանք նոր մոդելներ ստեղծել, պրոդուկտն արդեն շուկա հանելու աշխատանքներ իրականացնել: Մենք տվյալների հավաքագրման սարք ենք նախագծել, ծրագրով դրա վրա ենք աշխատել: Այն բազմաֆունկցիոնալ սարքավորում է, որը հնարավոր է օգտագործել եղանակի տեսության կայաններում, ջերմաստիճանի, խոնավության տվյալներ գրանցելու համար՝ ավտոմատացման, մեքենաշինության և այլ ոլորտներում: Այժմ շուկան ենք ուսումնասիրում»,- ասաց Արև Համբարձումյանը:

Տեղեկատվական տեխնոլոգիաները վերջին տարիներին Հայաստանում  զարգանում են արագ տեմպերով: Հայաստանի կառավարությունը այս ոլորտը գերակա է հռչակել: Ոլորտի հիմնական խնդիրը շարունակում է մնալ կադրերի պակասը, ինչի ուղղությամբ պետական մակարդակով ծրագրեր են իրականացվում: Յանան ու Արևը այն երիտասարդ մասնագետներից են, ովքեր ոչ միայն նորարար գաղափարներ են ստեղծում, այլ նաև դրանք վերածում են բիզնես նախագծերի՝ ներգրավելով ֆինանսավորման աղբյուրներ:

«Աջակցություն ՓՄՁ զարգացմանը Հայաստանում» ծրագիրը (EU SMEDA) Արևելյան գործընկերության երկրներում «ԵՄ-ն բիզնեսի համար» (EU4Business) և «ԵՄ-ն նորարարության համար» (EU4Inovation) նախաձեռնությունների մաս է: Եվրամիությունը համաֆինանսավորում է ծրագրի գրեթե 90 տոկոսը: Այն նախատեսում է հայկական փոքր ու միջին ընկերությունների, նորարար ստարտափերի, բիզնես ասոցիացիաների և տնտեսական կլաստերների զարգացում: EU SMEDA-ն հատուկ ուշադրություն է դարձնում մասնավորապես ճշգրիտ ճարտարապետության և ստեղծարար ճյուղերին:

Սույն հոդվածը պատրաստվել է «ԵՄ Արևելյան հարևանություն» ծրագրի շրջանակներումՀոդվածում արտահայտված կարծիքները պատկանում են բացառապես դրա հեղինակին

Ամենավերջինը ՀԱՋՈՂՈՒԹՅԱՆ ՊԱՏՄՈՒԹՅՈՒՆՆԵՐ
am
25.11.2021
Հայաստանի մշակութային մայրաքաղաք Գյումրիում արվեստը, ուսումն ու գիտությունը բարձրագույն արժեքներ են տեղացիների համար, իսկ քաղաքն ինքնին՝ ապրելու և գլուխգործոցներ ստեղծելու վայր: Գյումրին ու այնտեղ գործունեություն ծավալող փոքր ձեռնարկությունները միանգամից զգացին covid-19 համավարակի ազդեցությունը։
am
25.11.2021
Հայաստանի ՏՏ էկոհամակարգն արագորեն զարգանում է, իսկ աշխարհին առաջարկվող լուծումներն էլ թե՛ բազմազան են, և թե՛ նորարարական՝ արդի միտումներին ու զարգացումներին համահունչ։
am
25.10.2021
Ուսումնասիրությունները ցույց են տվել, որ «Երևանի» տեսակի ծիրանը մյուսների համեմատ ավելի քիչ շաքար է պարունակում, ինչի շնորհիվ ավելի օգտակար է։ Այս տեսակի հայրենիքը համարվում է Արարատյան դաշտավայրը, իսկ ավելի հստակ՝ Երևանը։

Քուքիներ
Այս կայքն օգտագործում է թխուկներ՝ ձեզ առաջարկելով կայքը թերթելու ավելի լավ հնարավորություններ: Կարդալ ավելին
Ես մերժում եմ թխուկները
Ես ընդունում եմ թխուկները